قصيدة الكبش الهارب للشاعر #رمضان_باعكيم
قصيدة الكبش الهارب للشاعر #رمضان_باعكيم
الكبش لي قالو هرب ما هو بمخطوف ….
هذا الكلام الصدق وإن تعرفونه …
لا تلفتون النظر للمهزله والشوف …
ترقبو للفلم لما يخرجونه ..
الكبش داخل زربهم والشغل معروف …
فكيف تتوقع لهم يخطفونه …
وهو وديعه عندهم باللحم والصوف …
وبشورهم لا أرادو يخطمونه …
هذي سياسه والسياسه شغلها عوف …
ومن تبعها يا عذابه يا جنونه …
السوق جزارين بسواطير وسيوف …
ومن يخالف رايهم يقتلونه …
والخوف ثم الخوف ثم الخوف …
من منصبه لا تراجع يفصلونه ..
باع الكرامه والوطن بميات وألوف …
على ما فعل بالله لا تحسدونه ..
والبعض صورة آدمي لكنه خروف …
بالقرش والدينار سعره يشترونه …
وكثير من لكباش خلف ستار مكشوف …
ولا أنتهت مدته بايذبحونه ..
هذا الكلام الواقعي والعقل مكلوف …
دم المواطن في الوطن يهدرونه …
تخطيط عفاشي وأمريكي كلاشنكوف …
يارب عسى الشيطان تعمى عيونه …
وكل ظالم مفتري تظهر له ظروف …
والوقت والأيام لازم يكشفونه …
ولعاد باكثر لكم خرطان ووصوف …
هذا كلامي عساكم تفهمونه …