اليتم يتم الادب للشاعر #راجح_المغيري

#أنت_سلوكك
اليتم يتم الادب
للشاعر #راجح_المغيري

اليتم يتم الأدب والموت موت الضمير

والحب حب المعالي باختلافاتها

والجرح جرح المشاعر من لسان الحقير

والصوم صوم الجوارح عن ملذاتها

والبخل بخل الغني والجود جود الفقير 

والبعد بعد النظر ماهي مسافاتها

والعز عز التقى والصبر صبر الضرير

والذل ذل المعاصي واقترافاتها

والقتل قتل الأمل في نفس من هو جدير

آمال روحه خذوها عن طموحاتها

والنور نور القلوب اللي تخاف المصير

القايمة بالفروض الخمس فاوقاتها

والحكم حكم الإمام العادل المستنير

والظلم ظلم الفتى روحه بزلاتها

والمجد مجد الشجاع اللي يقود المسير

والجهل جهل الحياة ونبل غاياتها

والفخر فخر التقرب للعلي القدير

ماهوب بفخر القبايل بانتساباتها

والشعر شعر الحكيم اشعور ماهو شعير

تعجبك فكرة بيوته وابتكاراتها

والغدر غدر الوطن لو ماعطاك الكثير

وشلون لا أكرمك في شتى مجالاتها

والعطف عطف الكبير ليا لقى له صغير

والضبط ضبط المشاعر وانفعالاتها

والحر حر المفارق خل حر الهجير

والضيق ضيق الصدور لقل طاعاتها

والفوز والله نجاتك من عذاب السعير

لا تحسب الفوز في الدنيا ولذاتها

القصيدة مغناة 
http://www.youtube.com/watch?v=WKwpbhn0urU