ربنا يغفر لنا …. قولوا آمين !

 

ربنا يغفر لنا …. قولوا آمين   !

 

المشهد الأول : خلينا بعيد احسن  !

أتسمعون التلبية …

لبيك اللهم لبيك ، لبيك لا شريك لك لبيك إن الحمد والنعمة لك والملك لا شريك لك .

أنا محدثكم الباحث عند المعبر الحدودي ، اقف لأتعرف عن قرب عن مشكلة الحجاج هنا وأسباب تأخر الإجراءات والانتظار للولوج الى السعودية ، وهنا معي بعض الحجاج الكرام نتعرف عليهم ونعرف القصة منهم … فأهلا بكم وبهم .

الباحث :  مرحبا أيها السادة الكرام ، دعوني اعيد استفساري عن سبب طول الإجراءات وطول الانتظار اين يقع الخطأ ؟

المتحدث الأول : نعم ماوصلت كشوفات الأسماء ، ما وصوها لهم .

الباحث : عفوا خيي لو تعرفنا باسمك وما علاقة الكشوف بالدخول والمعاملة .

المتحدث الأول : ما هلنيش ….

الباحث : ما هلك فين ؟

المتحدث الأول : هذا اسمي ما هلنيش ….

الباحث : أه … تفضل .

ماهلنيش : ذلحين الكشوف تهمهم لان معاهم أسماء ممنوع تدخل الحدود ، او يتم تحويلهم للجنة تحقيق .

الباحث : لماذا ؟

ماهلنيش : لا يكونوا من جماعة المتمردين ، ومعاهم لستة أسماء شكلهم يخافوا يسببوا لهم ازمة في الحج .

الباحث : وهل كشفوا عن صدورهم ؟

متحدث ثاني مقاطعا : كيف كشفوا ؟ هذول متمردين ، هذول روافض ليش يحجوا ؟!….

الباحث : عفوا عرف بنفسك .

المتحدث الثاني : حوشنابك …. هذا اسمي … المهم .. قلت لك هذول ملاعين الوالدين !!! …

الباحث : يعني عندك ثقة ..

حوشنابك : اكيد … شكلك من جماعتهم والا كيف ؟؟؟

الباحث : لا انا من الاعلام … عموما فهمت الان ان سبب التأجيل ان الكشوف لم تصل وهذا يدل على ان التأخير ناتج من الداخل من الحكومة .

ماهلنيش : اكيد …. ولذا وصل اليوم وفد حكومي لمتابعتنا … علشان يخارجوا الناس .

الباحث : تمام … طيب على فكرة ممكن اخذ في الحوار معاكم قليلا .
ماهلنيش : اكيد ، نحن كذا كذا منتظرين خلينا نجزعها هدرة .

الباحث : هل هي اول مرة زيارة للحج ؟

ماهلنيش : ايوه والله اول مرة ، بس لابد منها اشتي اكفر عن ذنوبي حتى اعود كيوم ولدتني امي .

الباحث : شكلك مليان .

حوشنابك مقاطعا : حتى انا والله اشتي اتوب … لان وراي شغل كثير بعد الحج … اشتي اضمن اني تطهرت من الذنوب السابقة .

الباحث : هل لي بالتدخل عن طبيعة عملكم .

ماهلنيش : قائد فريق الاغتيالات …

الباحث : ويش تقول ….

ماهلنيش : ليش خايف ، اهدأ هذا طبيعة عملي …

الباحث : طبيعة عملك ؟

ماهلنيش : ايوه … دورنا ننفذ بعض الاغتيالات ، او نجهز سيارات ملغمة .

الباحث : ولو فيها قلة ذوق ، انت من داعش .

ماهلنيش : اعوذ بالله ، ايش جاب هذا الكلام ، استغفرك اللهم واتوب اليك .

الباحث : طيب انت تتبع المتمردين .

ماهلنيش : شكلك ما تفهم قلت لك هذول روافض كيف اتبعهم .

الباحث : طيب ما فهمت .

ماهلنيش : نحن نتبع ناس كبار وبس ….

الباحث : طيب ما مسكوكم امن المناطق المحررة .

ماهلنيش : يومين ونكون برع ،اسمع شكلك تشتي تزودها غير الموضوع .. .

الباحث : اسمع انا احترت … عموما اخي الكريم … عفوا ذكرني بالاسم …

حوشنابك : قلت لك حوشنابك …
الباحث : ايش طبيعة عملك .

حوشنابك: تسهيل تسيير الأموال بين بين …

الباحث : بين ، بين ما فهمت …

حوشنابك : خلاصة تقدر تقول ميسر لتنظيف الأموال المنهوبة ….

الباحث : يعني …. فساد مالي .
حوشنباك : ايش تحسب انت ، فساد … لا لا … حق ومستحق ، كيف حاربنا مع الحكومة ببلاش … كل واحد يدور مصلحته .. افهمها ما بزيد كلمة

الباحث : لا خلاص ..خلينا بعيد احسن .. الله يتقبل منكم !

حوشنابك وماهلنيش : آمين .

 

المشهد الثاني :  شقدف !

اهلا بكم من جديد معي الاخوة هنا يتوجهون للمملكة لقضاء الحج أيضا ، ونسمع منهم فاهلا بكم وبهم :

الباحث : فهمت ان سبب تأخيركم هو عدم وصول الكشوف التي تحوي الأسماء الى اللجنة في الحدود ،فهل هذا صحيح ؟

المتحدث الأول : تقدر تقول كذا وتقدر تقول الدنيا فوضى وحرب وتعرف الطرف الضعيف ينذل اكثر ، حكومتنا في المهجر حق دنبعة وهنا عندنا دحبشة … يعني شقدف !

الباحث : الاسم الكريم …. يبدو انك طافح . اسمك الكريم

المتحدث : ابوالريش ، اكيد طافح ، اللي اعرفه يخلينا ابحث عن حد يقبل بي اغير الجنسية….

الباحث : ربنا يصبرك ، اذن نقول ان سبب العصيد اللي انتم فيه من كل الأطراف داخليا وخارجيا .

المتحدث الثاني مقاطعا : خارجيا تمام … داخليا لمو !

الباحث : عذرا لمو … !!!

المتحدث الثاني : بشبوش ، اسمي بشبوش ، لمو داخلي ماقد سوينا لهم ، عذبونا تعذيب ما درينا قالوا عتتحرروا ولا تحررنا ولا يحزنون… كل يوم اشقف اندف .

الباحث : لا اقصد انّ السبب  الداخلي المواطن، بل  اقصد أن السبب هو المتمردون.

بشبوش : كن وضح … لكن هذول الحوافيش  بلوة لكن مالهم علاقة بالموسم ، الموسم كله في المناطق المحررة .

الباحث : اذن السبب بسبب عدم التنسيق للحكومة مع لجنة الحج .

بشبوش : ايو ذي حكومة المهجر سرق حتى فلوس الحج نهبوها … ما خلصنا من الحوافيش ظهرلنا الفوانيس وشكرا سهان  .

الباحث : هل هي المرة الأولى للحج … نعم السؤال لك عمي أبو الريش ؟

أبو الريش : تصدق بالله كم مرات اروح المملكة بس ولا مرة حجيت ، بس هذي نويتها لله علشان يتقبل عذري ويسهل لي هجرتي .

الباحث : وأين عملكم ؟

أبو الريش : والله قصتي تقهر لو فاضي اقولك …

الباحث : لو يسمح اخونا بشبوش .

ابوالريش : أصلا هو جاري من زمان . واشتغلنا سوى .

بشبوش : ايوه وانا ازيد لو ينقص و قداحنا فاضيين .. و بوالريش قص ! ….

أبو الريش : طول عمري نظامي والتزم بالقواعد لما بعد التحرير ، والا و الفوضى عمت ، ويا قرارات ، و يا نهب ، لا شفت ولا قد شفت ، ولما نرفع شكاوي للريس ترجع فوق راسي لما وقفوني ، وجت فرصة اطلع الرياض ، وكنت في مكتب الفندم واشوف لك يا أوراق تتوقع ما يدري ايش فيها ، كل الفساد محاصر الريس وهو مسكين وشخط توقيعات ، وتعيينات ….

بشبوش : سكين ما هو مسكين كل هذا يسويه المهم يظل على المريسة ويمشي أي شي .

أبو الريش : لا تظلم …. المهم … ما تحملت رحت انصح ، قال لي كلامك سليم ، وما دريت الا وثاني يوم رجعت للبلد .

بشبوش : قلت لك …

أبو الريش : يا خي مش هو .

بشبوش : هيا جن ياخذك … قلت لك …

الباحث : لحظة ، فهمت ان الريس يوقع على أي شيء دون اطلاع مسبق .

أبو الريش : وايش تحسب، حتى لما عينوا سفراء جدد ما هو داري من عين الا لما حضروا ، ومشكلة السفيرة الأخيرة

الباحث : نعم ماهي المشكلة ؟

أبو الريش : نفس القصة ، وعموما لم تستلم المنصب ،والريس وعد بمراجعة الموضوع .

بشبوش : ما عيراجع شي ، اخرطي …. قلت لك الكبسة قفلت عليه الرؤية ….

الباحث : طيب هدي يا صحبي ، في الأخير انتم في توجه للحج للتوبة .

أبو الريش : اكيد ، لأني شاركت في كذا تمرير لقرارات غير نظامية في المحافظة … تؤدي الى تحقيق بتهم فساد ان استقر الوضع .

الباحث : وانت السبب فيها .

أبو الريش : لا ، وهذا ما يخفف عني، اكيد تتحملها قيادة المحافظة ، وفي الأخير  جت أوامر من فوق الراس ، وطبعا اللي حاصل عند الريس حاصل في الداخل … ونعديها شقدفة !

بشبوش : مثل عنا فرد شكل …. يا عم  خلي الطابق مستور … جينا نتخارج خارجونا …لما نعلن التوبة هذا ما يشتونا .

الباحث : الا انكم مقبلين على تأسيس دولة مدنية .

بشبوش : شقدف…  أين دولة وأين طلي ….

أبو الريش : ابني . لا تسهن لا من شرعية ولا من انقلاب … بس قل يارب تتخارج من عنده .

الباحث : احترت يا عم لكن أقول لكم تقبل الله طاعتكم ويسر امركم .

أبو الريش وبشبوش : آمين .

 

المشهد الثالث : هبل تايم !

مازلت ابحث عن إجابة ، وهنا التقي  اختين من الحجاج الكرام فاهلا بكم وبهما .

الباحث : وصلنا ان مشكلة الحجاج ناتجة عن خلل في التنسيق بين منظمي الحج و لجنة استقبال الحجيج في الحدود . صحيح هذا ؟

المتحدثة الأولى : حق هواه هوذا اللي قلته … بغينا نحج ذلحين في خراج واللي بنرجع .

الباحث : اختي اقصد من فين مشكلة الحج والوقوف .

المتحدثة : هاه ، قلت لي حق ابوهم هنذولا الشرعية لابوهم راعة ، شلوا مننا شي وشويات وذلحين ما حد منهم خارج نحنا .

الباحث : الله يسهل امرك .

المتحدثة : شفني افهمك ، معك خالتك فطمطم ، ذلحين تصورون .

الباحث : اكيد .

فطمطم : شف ياولدي ، عفاش ما بغى يخرج ، وهادي ما بغى يرجع ونحنا تعبنا ، ليه ما نجي صلح ونتخاري .. اسمع قل لهوذا ولد الشيخ يسمع مني يقولهم يكونها مصالحة ونتخاري … بس اهم شي ما يرجع حد منهم .. ما بغيناهم .. يجي حل .. يقع هو الريس …

الباحث : ان شاء الله وصلت رسالتك .

المتحدثة الثانية : هيا وانا ما تعطيني وجه

الباحث : لا ابدا تفضلي .

المتحدثة : اني زنبقة ، اشتي احج تفهم والا له ..

الباحث : اكيد الله يسهل امرك .

زنبقة : حكومة ام مهجر نشتيها توصي فلوس ما استلموش عيالي امعاش .

الباحث : شكرا لكما .. وصلت الرسالة .

 

الباحث : يبدو انني سأقر ان المشكلة عميقة . فاطراف النزاع لا تعي ولا تسترعي امر هؤلاء الناس ، يهم كل طرف ان يصل الى أي نصر وهمي أيا كان اسمه  ليعلنه في شاشاته العابسة ، ويبدو جليا ان أمور الدين عندما تختلط بأمور السياسة تفسدها وتجعل الحياة لعامة الناس صعبة … الا اننا لا نريد ان نقول لكم انه لا حلول واستسلموا .  بل نقول ان قبولكم بالانكسار والتطبيل للفساد باي اسم واي وجه هو صناعة للديكتاتوريات ، وفرصة للمتسلقين ليركبوا على رقابكم … النتيجة فعليا ان مثقفي اليمن والعرب افشلوا كل اتجاهات الحرب ، وسخافة التطبيل ، الا انهم عجزوا عن ايقاظ الناس بأن لا يعيشوا الأوهام ، حان الوقت ليكون للناس الخيار ، عليهم ان يصرخوا في وجه الجميع ويوقفوا القتل في بعضهم البعض ، ولا يسمحوا بأي تدخل من الخارج او الداخل في قراراتهم .

فقط #اعادة_نظر

الله اكبر الله اكبر الله الله اكبر ولله الحمد

#طيباللهايامكم

عساكم من عواده وعيدكم مبارك

محبتي الدائمة

 

احمد مبارك بشير

10\9\2016