مطلع العنين 1443 – الشاعر مبارك باعكيم
مطلع العنين
13ذو الحجه 1443
يارب جنبنا الفتن والغطرسه والكبرياء
سالك ولا تجعل ولايتنا في المتكبرين
اللي يحوكون الفتن ويقولوا احنا ابريا
ابليس والشيطان من حوكاتهم متبريين
شطحوا علوا وانت العلي كلمتك هي العلياء
ياحي يا قيوم ياعالي على المتعاليين
صلوا على الهادي محمد عا ختام الانبياء
لي ارسله ربه لنا بالهدي والحق المبين
وعلى إهل بيته والصحاب الطيبين الاتقياء
ياليت قومي واخوتي تبعوا مسار المتقين
سلام يامطلع قوي عدنا لساحتك أقوياء
وانتزعت القوه من إلي بالخطاء مستقويين
والتسويه ماشي كماها لاقد الناس اسويا
مابايقوم العدل إلا والعرب متساويين
واحنا عرب سمحين ما فينا نفاق ولا ريا
ما بعض حتى في الصلاه منافقين مرائيين
سلام عا عده يقودوها الرجال الاوفياء
سِلّّم على البوري رجل وافي وقومه وافيين
ومعاه بن مقشم حضر وقت الشدايد ما احتيا
واقف على موقفه في الشده وفي الوقت المحين
مابنسى تشريفهم لي جاوا للدار اعنيا
واهل العنين اهلي وانا واحد من اصحاب العنين
وسلام عا اهل الدعم خلوا ليلنا نور إ وضياء
كربان ماقصر ضوى مُوكبه قبل الضاويين
وعلى وكيل أول هني بالعيد وأهله اهنيا
نحنا في الجرسه وهم وعيالهم متهنيين
بكذب عليك إذا حسبته في حساب الانقياء
ماحد في السلطه نقي هذه الحقيقه واليقين يقين
غن ياحمد سالم عسى نا وانت نصبح اغنياء
والأغنياء يتحولوا لا شعراء ومغنين
والرزق بيد الله ياما ناس صبحوا اثرياء
وناس فقروا بعد ما كانوا من المستثريين
لا تحسب أن أهل الثراء شطار وإلا أذكياء
ذلا عطاء وارزاق ماجات بذكاء المتذيكين
لو شي ذكاء مابايحكمون البلاد الاغبياء
والاغبياء ذا الوقت ماعترفوا من المتغيبين
والأولياء ماتوا لعاد تقول وين الاولياء
ولعاد تحلم انه إيعوّد زمان الاولين
الشام خربت واليمن خربت وخربت ليبيا
لن العرب من يوم قاموا بالخراب ملبيين
غن بارك ألله فيك زاد الضُر وزاد الاستياء
كن ايش يعمل في صحابه من صحابه سيئين
شئ حل شئ مخرج من اصحاب الكحل والنيفيا
اما صحاب الشبو قدهم ع النويف منوفين
والشر والفتنه تخاووا والشياطين اخويا
ماشفتوا أهل الخمر واهل الفاليم متخاوين
وعصابة الدم والدسم ماهم علينا أوصياء
يكفي كفانا من وصايه نعرف المتواصين
وافوارقي نعرفه متغطرس رئيس ارتيريا
لليوم عاد احنيش منه واهلها متوترين
وان كان ربحان اليمن سمحوا لربح افريقيا
يدخل يفرقهم انا مانا من المتفرقين
انا جنوبي والجنوبين فرسان اعتيا
وامات ذيله ماتوقف في طريق العاتيين
قولوا لربح افريقيا انك شقي نحن اشقياء
وان كنت شاقي ع الخطاء نحن على الصح شاقين
مانته ملك من فاس ذلا من جماعة وريا
حبشي مرور والذي حولك كماك مورورين
الحاصل ان نحن وحلنا في قليلين الحيا
لي يوعدون احنا وينقلبون في لحظه وحين
واهل البلاد اموات ويقولون لك نحنا احيا
ماشي حياء معكم معاكم لحج يالمتلحوجين
ورطكم المجنون في المصتاب بالهستيريا
فاقد ترك سبعه مثيله فاقدين مهسترين
كل ماخلصتوا من صنم ركزوا بديله مومياء
وانتم عليكم صفقوا لمكفنين ميممين
واهل الطمع حتى الدواء غلووه من صابه عياء
ماينطرح رأسه يبيت يامعاون يامعين
من بعد سلبادين لصلي غصب نشرب سوبيا
سيؤن تعجن سوبيا والهند تعجن سولبين
فساد مستشري ورأس المفسده في تركيا
والحاكم المفسد يسيب المفسدين متركين
لكن لي فك مسلمي كرواتيا من صربيا
بايفك نحن من فساد المفسدين المربين
والكبر والشف والهوى مابايفيد الاهوياء
كل الذي تبعوا هواهم في جهنم هاوين
قم ليل يا باحارثه باع الكيا مولى الكيا
والملك مايبقى يزول الملك ع المتملكين
بعد الكياء ايكوا وشينغ بونغ بعد النوكيا
والوضع يبغى فهم ما يبغى عقول متنكين
مع تحياتي
باعكيم مبارك