من هنا وهناك مطلع شبام حضرموت 2017 آخر تحديث: 23 فبراير 2022 27 0 مشاركة المقال مطلع شبام حضرموت 2017 من الشاعر : مبارك بن عمر باعكيم يا مؤنِّسِ المكدُور فرّج عانفوس امكدّرَه الكل يشكِي من كدُورَه هَدّتِ النّاس الكُدُور يلعب بنا عنبُور لي عامد ضلال العَنبرَه لا قُلت : قُوتي بَا عبُورَه قال : ممنوع العُبُور الجار والمجرُور جارَوا جم على المتجِوّرَه لي ما حفِظ حق المجُورَه باطلي وعمله جُور جارَوا على المَكسُور لي فيه الضّلوع امكسّرَه يالله ٱصلحه وٱصلح كسورَه لي معيقَتهُ الكُسُور صلُّوا على المنصُور لي أيّده ربُّه وٱنصَرَه لا تحسَبون الكُون صُورَه عاد بعدُه نفِخْ صُور والقَهر والتَحسُور ما باينفَعِ المتحِسّرَه لي ماحسب مَطلَع حسُورَه با تعقّرهُ الحسُور دنيا متاع اغرُور عِش واحسِب حسابِ ٱلغرغَرَه عِلّة بن آدم في غرُورَه قاتَل ٱلله الغُرُور سلام ع ٱم السُّور لي فيه الحصُون امسوّرَه حصن الدّول ماطاح سُورَه يوم له سِدّه وسُور والليله الا نُور والصفراء (شبام) امنوّرَه فرحه ومطلَع هَلّ نورَه زاد فوق النُّور نُور ليلة هنا وسرُور هلّت والأمور اميسَّرَه كل من ضوى حصّل سرُورَه عِيدَنا نُور وسرُور يالمَطلَع المزرُور لي فيك الرّجال امزَرزَره ما اعتادوا الا عالزّرُورَه لي يزرُّون الزّرُور عا قصبة الحَنجُور نِسنِس يارقيق الحَنجَرَه واتركك من مولى حَجًورَه لي تبِع شرح الحجُور يومه عديم الشُّور دبَّر والجِمَال امشوّرَه أعمى ومن حُوله مشُورَه شُورهم ياخَسّ شُور ماهو أبو المشهُور لي خذها وقدها امشهّرَه خذها الذي ضيّع شهُورَه يوم ما عَدّ الشّهُور قات.. وبلاء .. وخمُور صِد وابعد عن المتخمّرَه كل البلاء جاء من خمُورَه بالبَلايا والخمُور فتنِه ودَم وشرُور جم تصبح رؤوس امشَرشَرَه ماجاوا نحنا من شرُورَه لي يزِرْعُونِ الشّرُور نحنا السبب في الهُور نحنا نتبَعِ المتهوّرَه لحقاف ماشفطَوا نهُورَه غير لي فوق النّهُور زُمرَة كبير الكُور لي كُورُه غدا مثل الكرَه مهما كبُر بطنه وكُورَه بايظل الكُور كُور لي بدَّل الساطُور في حَيتْ القلم والمسطَرَه كل ماتسجّل في سُطُورَه باتبينهُ السُّطُور ورفيقهُ الداغُور لي سيلُه وقَف في مدغَرَه هو ضنّها غُورَه بغُورَه من لحِق غُوره يغُور دنيا تلِف وتدُور واللي ماحسَب للدائرَه ماعذِر ماياتيه دُورَه دُور ياتي بعد دُور لا ماصبِح معقُور باتصبح جِماله معقَرَه كُل منِ ٱستامَن عالعقُورَه ياعَقُورُه بالعُقُور لا يقول : أنا عاشُور ومحمِّل حَمُول امعشَّرَه لي خذه يايدفَع عَشُورَه يايحِط رأسُه عَشُور معجب بهذه:إعجاب تحميل... 0 27 مشاركة المقال
